Эстафета алімпійскага агню стартавала ў Пекіне

02 Лютага 2022

Эстафета агню зімовай Алімпіяды 2022 года стартавала сёння ў Пекіне. Урачыстая цырымонія адбылася ў Алімпійскім парку на поўначы сталіцы КНР, паведамляе ТАСС. Эстафета пачалася ў 09.16 паводле мясцовага часу. "Аб'яўляю старт эстафеты агню зімовай Алімпіяды 2022 года ў Пекіне", - заявіў на цырымоніі першы віцэ-прэм'ер Дзяржсавета КНР Хань Чжэн. З-за пандэміі маршрут і працягласць эстафеты істотна скарочаныя. Для прадухілення рызыкі распаўсюджвання каранавіруса эстафета пройдзе без гледачоў. Акрамя таго, яе этапы размешчаны ўдалечыні ад ажыўленых вуліц і раёнаў. Эстафета ўключыць 12 ключавых этапаў у трох кластарах правядзення алімпійскіх спаборніцтваў: у Пекіне і ў горадзе Чжанцзякоу выдзелена па пяць зон для перадачы алімпійскага агню, яшчэ дзве размешчаны ў сталічным раёне Яньцын. Адзінаццаць этапаў эстафеты знаходзяцца па-за межамі "сістэмы замкнёнага цыкла", унутры якога пражываюць усе замежныя дэлегацыі, у ім размешчаны спартыўныя аб'екты і алімпійскія вёскі. 4 лютага факел вернецца ў Пекін і прыбудзе ў Алімпійскі парк, на тэрыторыі якога размешчаны нацыянальны стадыён "Птушынае гняздо", дзе пройдзе цырымонія адкрыцця Алімпіяды. У агульнай складанасці ў эстафеце прымуць удзел каля 1,2 тыс. факеланосцаў ва ўзросце ад 14 да 86 гадоў. Акрамя таго, у ёй будуць удзельнічаць прадстаўнікі амаль 20 краін і рэгіёнаў свету. Упершыню ў гісторыі для перадачы факела будуць задзейнічаны не толькі людзі, але і машыны: робаты-амфібіі пераправяць агонь пад вадой у рацэ Юндзін, а на ўчастку ў прамысловым парку "Шауган" (частка парку зімовых Алімпійскіх гульняў) будуць задзейнічаны беспілотныя транспартныя сродкі.