Развіццё экатурызму ў "Запаведным Паазер'і" абмяркуе беларуска-расійская камісія ў Верхнядзвінскім раёне

12 Мая 2022

Змешаная камісія, створаная для каардынацыі работы па рэалізацыі пагаднення паміж Беларуссю і Расіяй аб стварэнні асабліва ахоўнай зоны на прыгранічных тэрыторыях "Запаведнае Паазер'е", сёння правядзе першае пасяджэнне. Аб гэтым карэспандэнту БЕЛТА паведамілі ў Віцебскім абласным камітэце прыродных рэсурсаў і аховы навакольнага асяроддзя. Сустрэча адбудзецца ў пасёлку Дабраплёсы Верхнядзвінскага раёна. Эксперты абмяркуюць праграму мерапрыемстваў на 2022-2023 гады, стварэнне на існуючых экалагічных маршрутах у "Запаведным Паазер'і" месцаў памяці загінуўшых падчас Вялікай Айчыннай вайны, а таксама развіццё экалагічнага турызму. Акрамя таго, камісія вызначыцца з месцам і датай наступнага пасяджэння. Урады дзвюх краін падпісалі пагадненне аб стварэнні ўнікальнага запаведніка ў верасні 2017 года ў Сочы. Праз паўгода дакумент зацвердзіў Саўмін Беларусі. Адказнымі за рэалізацыю дамоўленасцей прызначылі два міністэрствы - прыродных рэсурсаў і аховы навакольнага асяроддзя Рэспублікі Беларусь і прыродных рэсурсаў і экалогіі Расійскай Федэрацыі. У асабліва ахоўную прыродную зону ўключылі беларускія заказнікі "Чырвоны бор", "Асвейскі" і расійскі нацыянальны парк "Себежскі". Эколагі адзначалі, што маюць намер адрадзіць папуляцыю зуброў. "Гэта тэрыторыя створана з мэтай захавання біялагічнай і ландшафтнай разнастайнасці Віцебскага Паазер'я і Себежскага Паазер'я, садзейнічання двухбаковаму супрацоўніцтву ў галіне аховы навакольнага асяроддзя і рацыянальнага выкарыстання прыродных рэсурсаў з улікам экалагічнага, сацыяльнага і культурнага прыярытэтаў, - удакладнілі ў камітэце. - Сярод іншых мэт. маніторынгу навакольнага асяроддзя, вывучэнне прыродных комплексаў і аб'ектаў, а таксама развіццё экалагічнага турызму”.